2 Thessalonians 3
1នៅទីបញ្ចប់នេះបងប្អូនអើយ! សូមអធិស្ឋានឲ្យយើងផងដើម្បីឲ្យព្រះបន្ទូលរបស់ព្រះអម្ចាស់បានប្រកាសចេញទៅយ៉ាងឆាប់រហ័សនិងទទួលបានការសរសើរដូចជានៅក្នុងចំណោមអ្នករាល់គ្នាដែរ 2ហើយឲ្យយើងបានរួចផុតពីមនុស្សពាលនិងពីមនុស្សអាក្រក់ដ្បិតមិនមែនគ្រប់គ្នាសុទ្ធតែមានជំនឿទេ 3ប៉ុន្ដែព្រះអម្ចាស់ស្មោះត្រង់ព្រះអង្គនឹងពង្រឹងអ្នករាល់គ្នាឲ្យមាំមួនឡើងហើយការពារអ្នករាល់គ្នាពីអារក្សសាតាំងផង។ 4យើងក៏ជឿជាក់នៅក្នុងព្រះអម្ចាស់អំពីអ្នករាល់គ្នាដែរថាអ្នករាល់គ្នាកំពុងប្រព្រឹត្ដហើយនឹងប្រព្រឹត្ដតទៀតតាមសេចក្ដីដែលយើងបានបង្គាប់មកអ្នករាល់គ្នា។ 5សូមព្រះអម្ចាស់នាំចិត្តអ្នករាល់គ្នាទៅក្នុងសេចក្ដីស្រលាញ់របស់ព្រះជាម្ចាស់និងការស៊ូទ្រាំរបស់ព្រះគ្រិស្ដចុះ។ 6ឥឡូវនេះបងប្អូនអើយ! យើងបង្គាប់អ្នករាល់គ្នាក្នុងព្រះនាមព្រះយេស៊ូគ្រិស្ដជាព្រះអម្ចាស់របស់យើងថាចូរចៀសឲ្យផុតពីបងប្អូនណាដែលរស់នៅគ្មានសណ្ដាប់ធ្នាប់ហើយមិនស្របតាមសេចក្ដីដែលអ្នករាល់គ្នាបានរៀនពីយើង 7ដ្បិតអ្នករាល់គ្នាដឹងហើយថាត្រូវយកតម្រាប់តាមយើងរបៀបណាព្រោះយើងមិនបានរស់នៅដោយគ្មានសណ្ដាប់ធ្នាប់ក្នុងចំណោមអ្នករាល់គ្នាទេ 8យើងក៏មិនបានបរិភោគអាហាររបស់អ្នកណាម្នាក់ដោយទទេដែរគឺយើងធ្វើការនឿយហត់ហើយលំបាកទាំងយប់ទាំងថ្ងៃដើម្បីកុំឲ្យយើងទៅជាបន្ទុកដល់អ្នកណាម្នាក់ក្នុងចំណោមអ្នករាល់គ្នាឡើយ 9នេះមិនមែនមានន័យថាយើងគ្មានសិទ្ធិនោះទេគឺយើងធ្វើជាគំរូដើម្បីឲ្យអ្នករាល់គ្នាយកតម្រាប់តាមយើងវិញ 10ដ្បិតកាលយើងនៅជាមួយអ្នករាល់គ្នាយើងបានបង្គាប់អ្នករាល់គ្នាអំពីការនេះដែរថាបើអ្នកណាមិនចង់ធ្វើការមិនត្រូវឲ្យអ្នកនោះបរិភោគទេ 11ព្រោះយើងឮថាមានអ្នកខ្លះក្នុងចំណោមអ្នករាល់គ្នារស់នៅគ្មានសណ្ដាប់ធ្នាប់ហើយមិនធ្វើការអ្វីសោះប៉ុន្ដែចូលចិត្ដជ្រៀតជ្រែកកិច្ចការអ្នកដទៃ។ 12ដូច្នេះយើងបង្គាប់និងដាស់តឿនដល់មនុស្សបែបនោះក្នុងព្រះអម្ចាស់យេស៊ូគ្រិស្តថាសូមឲ្យពួកគេធ្វើការដោយស្ងៀមស្ងាត់ហើយបរិភោគអាហាររបស់ខ្លួនចុះ។ 13ចំពោះអ្នករាល់គ្នាវិញបងប្អូនអើយ! កុំនឿយណាយនឹងប្រព្រឹត្ដល្អឡើយ។ 14បើអ្នកណាមិនស្ដាប់តាមពាក្យសំដីរបស់យើងក្នុងសំបុត្រនេះទេចូរសំគាល់អ្នកនោះចុះហើយកុំឲ្យមានទំនាក់ទំនងជាមួយគេឡើយដើម្បីឲ្យគេខ្មាស 15ប៉ុន្ដែមិនត្រូវរាប់គេជាសត្រូវឡើយផ្ទុយទៅវិញត្រូវដាស់តឿនគេដូចជាបងប្អូនវិញ។ 16សូមព្រះអម្ចាស់នៃសេចក្ដីសុខសាន្តប្រទានសេចក្ដីសុខសាន្តដល់អ្នករាល់គ្នាគ្រប់ពេលវេលាជានិច្ច។ សូមព្រះអម្ចាស់គង់ជាមួយអ្នករាល់គ្នា។ 17ខ្ញុំប៉ូលសរសេរពាក្យជម្រាបសួរនេះដោយផ្ទាល់ដៃហើយជាសំគាល់នៅក្នុងគ្រប់សំបុត្ររបស់ខ្ញុំខ្ញុំសរសេរដូច្នេះថា 18សូមឲ្យអ្នករាល់គ្នាបានប្រកបដោយព្រះគុណរបស់ព្រះយេស៊ូគ្រិស្តជាព្រះអម្ចាស់របស់យើង៕
Copyright information for
KhmKCB